Məxfilik siyasəti
Cebix tətbiqində və cebix.app saytında hansı məlumatları topladığımız və onlarla nə etdiyimiz.
1. Tətbiqdə nəyi toplayırıq
Ad, soyad, e-poçt, universitet, tələbə kartının hər iki üzünün şəkli və selfi (sonra profil şəklin olur); endirim tarixçən (harada, nə vaxt, hansı təklif), coin hərəkətləri və şirkətlərə müraciətlərin. Seçilmiş məhsulların yalnız telefonunda qalır. Yarımçıq qalan təsdiqin addımı və kartın şəkilləri də kartı göndərənə qədər yalnız telefonunda saxlanılır; kartı göndərəndə və ya hesabdan çıxanda silinir. Şifrəni yalnız şifrələnmiş (hash) şəkildə saxlayırıq.
2. Saytda nəyi toplayırıq
"Çıxanda xəbər ver" formasında: e-poçtun və saytın dili. "Biznes üçün" formasında: biznesin adı, adın, telefon, istəyə görə e-poçt, sahə və qeyd. Hər sorğuda server texniki qeyd aparır (IP ünvanı, brauzer, tarix və açılan səhifə) — sui-istifadəni dayandırmaq və xətaları tapmaq üçün; bu qeydlər qısa müddət saxlanılır. Çatbota yazdığın suallar və onun cavabları (saytın dili və tarixlə) saxlanılır; IP ünvanın və ya adın onlara bağlanmır. Saytda reklam izləyiciləri yoxdur; ziyarət sayını Cloudflare-in cookie-siz statistikası ilə görürük.
3. Nə üçün
Tələbə statusunu yoxlamaq, endirimi kassada təsdiqləmək, coin hesablamaq, müraciətini şirkətə ötürmək, tətbiq çıxanda sənə bir dəfə xəbər vermək, biznes müraciətinə cavab vermək və xidməti yaxşılaşdırmaq üçün. Məlumatlarını reklam üçün satmırıq.
4. Tələbə kartı və selfi
Tələbə kartının şəkli qapalı yaddaşda saxlanılır: onu yalnız yoxlamanı aparan Cebix əməkdaşları görür, mağaza və şirkətlər görmür. Kartın hər iki üzünün şəkli hesabın açıq olduğu müddətdə, hesabını silsən isə daha 1 il saxlanılır: eyni şəxsin təkrar qeydiyyatdan keçib-keçmədiyini yoxlamaq və saxta hesabların qarşısını almaq üçün. 1 il bitəndə şəkillər avtomatik silinir. Təsdiq zamanı kartdakı tələbə nömrəsini qeyd edirik ki, bir kartla yalnız bir hesab açılsın; nömrə şəkillərlə eyni müddət saxlanılır. Kartı göndərəndə tətbiq Google (Play Integrity) və ya Apple (App Attest) vasitəsilə yoxlanılır ki, şəkillər əsl Cebix tətbiqindən gəlsin; bu yoxlamada adın, e-poçtun və şəkillərin ötürülmür. Selfi profil şəklin olur — kassir QR-ı gətirənin sən olduğunu onunla yoxlayır. Profil şəklini istənilən vaxt dəyişə bilərsən.
5. Tərəfdaşlar nə görür
QR kodu oxuyan mağaza adını, soyadının baş hərfini, universitetini, statusunu və profil şəklini görür (məs. "Aysel M., ADA") — səni tanımaq üçün. E-poçtun və tələbə kartın tərəfdaşlara ötürülmür. Kassir QR-dakı şəklin səninlə uyğun gəlmədiyini bildirə bilər: onda endirim verilmir, bildiriş isə (mağaza və tarix) qeydə alınır; bir neçə mağaza bildirsə, hesab yoxlanılana qədər dayandırılır. Saytın formalarına yazdıqların heç bir tərəfdaşa verilmir.
6. Məkan
İcazə versən, məkanın yalnız telefonunda istifadə olunur: məsafəni göstərmək və seçilmiş məhsulun satıldığı yerə yaxınlaşanda xəbər vermək üçün. Məkanını serverimizə göndərmirik. İcazəni istənilən vaxt telefon ayarlarından ləğv edə bilərsən.
7. Kim emal edir
Məlumatlar Cebix-in öz serverlərində saxlanılır. Sayt və tətbiqin trafiki Cloudflare vasitəsilə keçir: o, bağlantını şifrələyir və hücumlardan qoruyur, bu zaman IP ünvanını və sorğunu emal edir. Çatbota yazdığın mətn cavab hazırlamaq üçün OpenAI-a göndərilir; OpenAI onu model öyrətmək üçün istifadə etmir. Başqa üçüncü tərəflə məlumat paylaşmırıq, qanunun tələb etdiyi hallar istisnadır. Formaları göndərəndə botları ayırmaq üçün Google reCAPTCHA istifadə olunur: Google brauzer və cihaz haqqında texniki məlumatı və IP ünvanını emal edir; buna Google-un Məxfilik siyasəti və Xidmət şərtləri tətbiq olunur.
8. Saxlanma və silinmə
Tətbiq məlumatlarını hesabın açıq olduğu müddətdə saxlayırıq; hesab silinəndən sonra yalnız tələbə kartının şəkilləri 1 il qalır (4-cü bölmə), sonra avtomatik silinir. Xəbər siyahısındakı e-poçtu tətbiq çıxana və ya sən imtina edənə qədər, biznes müraciətini müraciət bağlanana qədər, çatbot söhbətlərini isə 90 gün saxlayırıq. Hesabını silmək, siyahıdan çıxmaq və ya məlumatlarının surətini almaq üçün support@cebix.app ünvanına yaz — 30 gün ərzində cavab veririk. Qanunla saxlanması tələb olunan qeydlər istisnadır.
9. Qoruma və hüquqların
Bağlantılar şifrələnir, girişlər cihaz tokenləri ilə qorunur. "Fərdi məlumatlar haqqında" Azərbaycan Respublikası Qanununa əsasən məlumatlarını görmək, düzəltmək və silinməsini tələb etmək hüququn var. Cookie-lər haqqında: Cookie siyasəti.
10. Cebix Kassa (kassirlər)
Kassa tətbiqində kassirin adını və e-poçtunu (onları məkanın sahibi biznes panelində yazır), şifrəsini (yalnız hash), giriş vaxtlarını, cihazın adını, təsdiqlədiyi endirimləri (vaxt, məbləğ, filial) və dəstəyə yazdıqlarını saxlayırıq. Kamera yalnız telefonda QR oxumaq üçün işləyir; şəkil saxlanmır və göndərilmir. Bu məlumatlar kassanı işlətmək, saxtakarlığın qarşısını almaq və məkanın hesabatı üçündür, heç kimə satılmır. Kassir hesabını tətbiqdə Daha çox → Hesabı sil ilə silə bilər; satış qeydləri məkanın hesabatı üçün adsız qalır.
